ਵਿਅੰਗ

ਪੰਜਾਬ ਦੀ ਅਵਾਜ਼ “ਭਗਵੰਤ ਮਾਨ”

ਵੈਸੇ ਤਾਂ ਮਖੌਲ,ਵਿਅੰਗ ਜਾਂ ਕੋਈ ਸੱਚੀ ਗੱਲ ਕਿਸੇ ਵੀ ਭਾਸ਼ਾ ਵਿੱਚ ਕਹੀ ਜਾਂ ਲਿਖੀ ਗਈ ਹੋਵੇ ਉਸਨੂੰ ਪੜ੍ਹਨ-ਸੁਣਨ ਵਿੱਚ ਅਨੰਦ ਆਉਣਾ ਲਾਜ਼ਮੀ ਹੈ।ਪਰ,ਆਪਣੀ ਮਾਂ-ਬੋਲੀ ਭਾਸ਼ਾ ਵਿੱਚ ਪੜ੍ਹਨ-ਸੁਣਨ ਦਾ ਇੱਕ ਵੱਖਰਾ ਹੀ ਨਜਾਰਾ ਹੈ,ਇੱਕ ਆਪਣਾ ਵੱਖਰਾ ਹੀ ਸੁਆਦ ਹੈ।ਹੁਣ ਅਸੀਂ ਪੰਜਾਬੀ ਹਾਂ ਤੇ ਪੰਜਾਬੀ ਭਾਸ਼ਾ ਵਿੱਚ ਕੀਤੇ ਗਏ ਮਖੌਲ ਅਤੇ ਵਿਅੰਗ ਨੂੰ ਸੁਣਨਾ ਵੱਧ ਪਸੰਦ ਕਰਦੇ ਹਾਂ।ਹਾਸੇ-ਮਖੌਲ ਦੀ ਇਸ ਪ੍ਰੰਪਰਾ ਨੂੰ ਬਹੁਤ ਉੱਚੇ ਪੱਧਰ ਤੇ ਲੋਕਾਂ ਵਿੱਚ ਪ੍ਰਸਿੱਧ ਕਰਨ ਦਾ ਸਿਹਰਾ ਪੰਜਾਬ ਦੇ ਕੁਝ ਵਧੀਆ ਗਿਣੇ-ਚੁਣੇ ਕਲਾਕਾਰਾਂ ਵਿੱਚੋਂ ਇੱਕ “ਭਗਵੰਤ ਮਾਨ” ਨੂੰ ਜਾਂਦਾ ਹੈ, ਜਿਹਨਾਂ ਨੇ ਆਪਣੀ ਪ੍ਰਤਿਭਾ ਸਦਕਾ ਕਰੋੜਾਂ ਪੰਜਾਬੀਆਂ ਦੇ ਦਿਲਾਂ ‘ਚ ਜਗ੍ਹਾ ਬਣਾਈ।

ਕੁਝ ਸਾਲ ਪਹਿਲਾਂ ਭਗਵੰਤ ਮਾਨ ਨੇ ਆਪਣੇ ਕਲਾਕਾਰੀ ਦੇ ਖੇਤਰ ਵਿੱਚ ਮੱਲਾਂ ਮਾਰਨ ਤੋਂ ਬਾਅਦ ਪੰਜਾਬੀਆਂ ਦੇ ਦੁਖ-ਦਰਦ ਨੂੰ ਮਹਿਸੂਸ ਕਰਦਿਆਂ ਉਨ੍ਹਾਂ ਨੂੰ ਰਾਜਨੀਤਿਕ ਪਾਰਟੀਆਂ ਦੀ ਦੇਣ “ਗੁਰਬਤ ਅਤੇ ਧੱਕੇਸ਼ਾਹੀ” ਦੀ ਦਲਦਲ ਵਿੱਚੋਂ ਕੱਢਣ ਲਈ ਕਮਰ ਕਸੀ।ਉਹ ਬਹੁਤ ਵੱਡੇ ਫਰਕ ਨਾਲ ਸਥਾਪਿਤ ਪਾਰਟੀਆਂ ਦੇ ਉਮੀਦਵਾਰਾਂ ਨੂੰ ਚੋਣਾਂ ਵਿੱਚ ਹਰਾਕੇ ਐਮ.ਪੀ ਬਣੇ ਅਤੇ ਲੋਕਸਭਾ ਅਸੈਂਬਲੀ ਪਹੁੰਚੇ।ਜਿੱਥੇ ਰਵਾਇਤੀ ਢੰਗ ਛੱਡ ਪੂਰੀ ਦ੍ਰਿੜਤਾ ਨਾਲ ਆਪਣੇ ਹੀ ਅੰਦਾਜ਼ ਵਿੱਚ ਜਨਤਾ ਦੇ ਮਸਲੇ ਚੁੱਕੇ ਜਿਹਨਾਂ ਦੀ ਲੋਕਾਂ ਵਲੋਂ ਖੂਬ ਪ੍ਰਸ਼ੰਸਾ ਵੀ ਹੋਈ।

ਐਤਕੀ 2017 ਦੀ ਪੰਜਾਬ ਵਿਧਾਨ ਸਭਾ ਚੋਣਾਂ ਵਿੱਚ ਉਨ੍ਹਾਂ ਵਲੋਂ ਕੀਤੀ ਜਾ ਰਹੀ ਮਿਹਨਤ ਦਾ ਤਾਂ ਕੋਈ ਜਵਾਬ ਹੀ ਨਹੀਂ।ਉਨ੍ਹਾਂ ਪੰਜਾਬ ਨੂੰ ਇੱਕ ਅਵਾਜ਼ ਵਿੱਚ ਬੋਲਣ ਲਾ ਦਿੱਤਾ ਹੈ ਕਿ ਜਨਤਾ ਹੁਕਮਰਾਨਾਂ ਦੀ ਧੱਕੇਸ਼ਾਹੀ ਹੋਰ ਨਹੀਂ ਸਹੇਗੀ ਅਤੇ ਇਸ ਵਾਰ ਇੱਕ ਐਹੋ ਜਿਹੀ ਸਰਕਾਰ ਨੂੰ ਸੇਵਾ ਦਾ ਮੌਕਾ ਦੇਵੇਗੀ ਜੋ ਸੱਚ ਹੀ ਸੇਵਾ ਕਰਨਾ ਚਾਹੁੰਦੀ ਹੈ...ਰਾਜ ਨਹੀਂ।

ਇਹ ਮੇਰੀ ਆਪਣੀ ਸੋਚ ਹੈ ਕਿ ਜੇ ਲੋਕ ਵਧ ਚੜ੍ਹ ਕੇ ਆਮ ਆਦਮੀ ਪਾਰਟੀ ਦਾ ਸਾਥ ਦੇਣ ਤਾਂ ਕੋਈ ਸ਼ੱਕ ਦੀ ਗੱਲ ਨਹੀਂ ਕਿ ਪੰਜਾਬ ਦਾ ਭਵਿੱਖ ਸਹੀ ਹੱਥਾਂ ਵਿੱਚ ਹੋਵੇਗਾ ਅਤੇ ਲੋਕਾਂ ਨੂੰ ਇਨਸਾਫ ਤੋਂ ਇਲਾਵਾ ਵਧਣ-ਫੁੱਲਣ ਦੇ ਵਾਧੂ ਮੌਕੇ ਮਿਲਣਗੇ,ਅਤੇ ਦੁਬਾਰਾ ਇਹ ਪੰਜਾਬ ਫਿਰ ਤੋਂ ਆਪਣੇ ਸਾਬਤ-ਸਥਿਰ ਉਸੇ ਰੂਪ ਵਿੱਚ ਪੰਜਾਬੀਆਂ ਦੇ ਹੱਥ ਹੋਵੇਗਾ ਜਿਸ ਖੁਸ਼ਹਾਲ ਪੰਜਾਬ ਦੀ ਸਿਫਤਾਂ-ਬਾਤਾਂ ਅਸੀਂ ਸੁਣ-ਸੁਣ ਵੱਡੇ ਹੋਏ ਹਾਂ।

ਧੰਨਵਾਦ।

ਜਗਦੀਸ਼ ਕੁਮਾਰ ਦਿੱਸ਼ਾ

16/01/2017

{ਚਿੱਤਰ : ਜਗਦੀਸ਼ ਦਿੱਸ਼ਾ}

(ਇਹ ਲੇਖਕ ਦੇ ਨਿੱਜੀ ਵਿਚਾਰ ਹਨ)

ਪੰਜਾਬ ਚਾਹੁੰਦੈ ਜਵਾਬਦੇਹ ਸਰਕਾਰ

ਪੰਜਾਬ ‘ਚ ਨਵੀਂ ਸਰਕਾਰ ਕਿਸ ਦੀ ਬਣੂ ਕਿਸ ਦੀ ਨਹੀਂ ਹਾਲੇ ਕੁਝ ਨੀਂ ਕਹਿ ਸਕਦੇ।ਪਰ,ਜੇ ਪਹਿਲਾਂ ਆਲਾ ਹਿਸਾਬ ਲਾਈਏ...ਕਿ ਜੇ ਇਹੀ ਦੋਏ ਪਾਰਟੀਆਂ ਹੁੰਦੀਆਂ ਤਾਂ ਕਿਸੇ ਨੂੰ ਕੋਈ ਸ਼ੱਕ ਨੀਂ ਸੀ ਕਿ ਐਤਕੀ ਕਾਂਗਰਸ ਪਾਰਟੀ ਪੱਕਾ ਜਿੱਤਦੀ।ਵਜ੍ਹਾ ਇਹ ਨਹੀਂ ਕਿ ਕਾਂਗਰਸ ਦਾ ਰਾਜ ਕੋਈ ਬਾਹਲਾ ਵਧੀਆ ਸੀ ਤਾਂ ਉਹ ਜਿੱਤਦੇ,ਬਲਕਿ ਅਸਲ ਵਜ੍ਹਾ ਇਹ ਹੈ ਕਿ ਜਨਤਾ ਅਕਾਲੀਆਂ ਦੀ ਨੀਤੀਆਂ ਨੂੰ ਪਸੰਦ ਏ ਨੀਂ ਕਰਦੀ ਤੇ ਜਿਹੜਾ ਇਹਨਾਂ ਉੱਤੇ ਜਨਤਾ ਦੇ ਪੈਸੇ ਦੀ ਲੁੱਟ-ਘਸੁੱਟ ਕਰਨ ਦਾ,ਲੋਕਾਂ ਦੇ ਕਾਰੋਬਾਰਾਂ ‘ਚ ਜਬਰਦਸਤੀ ਹਿੱਸੇਦਾਰੀ ਕਰਨ ਦਾ,ਨਸ਼ੇ ਨੂੰ ਸ਼ੈ ਦੇਣ ਦਾ ਅਤੇ ਆਮ ਇਨਸਾਨ ਨੂੰ ਰੋਜੀ-ਰੋਟੀ ਤੋਂ ਵੀ ਭੁੱਖਿਆਂ ਮਾਰਨ ਦੇ ਇਲਜਾਮ ਲਗਦੇ ਆਏ ਨੇ...ਇਹਨਾਂ ਦੀ ਹਾਰ ਦੇ ਕਾਰਨ ਬਣਦੇ।

ਪਰ,ਸ਼ਾਇਦ ਪੰਜਾਬ ਦੀ ਸਿਆਸਤ ਵਿੱਚ ਇਹ ਪਹਿਲਾ ਮੌਕਾ ਹੈ ਕਿ ਇਸ ਵਾਰ ਨਵੀਂ ਉੱਭਰੀ ਆਮ ਆਦਮੀ ਪਾਰਟੀ ਨੇ ਇਸ ਇਲੈਕਸ਼ਨ ਨੂੰ ਇੱਕ ਜੰਗ ਵਿੱਚ ਤਬਦੀਲ ਕਰ ਦਿੱਤੈ,ਅਤੇ ਰਿਵਾਇਤੀ ਧੜਿਆਂ ‘ਚ “ਜਵਾਬਦੇਹੀ” ਦਾ ਹਥਿਆਰ ਲੈ ਇੱਕ ਹੋਰ ਮਜਬੂਤ ਧੜਾ ਆ ਵੜਿਐ ਜਿਹੜਾ ਇਹਨਾਂ ਦੋਹਾਂ ਧੜਿਆਂ ਤੋਂ ਵੱਖਰੀ ਵਿਚਾਰਧਾਰਾ ਲੈ ਕੇ ਆਇਐ।

ਮੈਨੂੰ ਲਗਦੈ ਕਿ ਲੋਕ ਨਵੀਂ ਸੋਚ ਨੂੰ ਆਪਣਾ ਯੋਗਦਾਨ ਵੱਧ ਦਿੰਦੇ ਨੇ ਅਤੇ ਪੁਰਾਣੇ ਲਾਰਿਆਂ ਤੇ ਹੁਣ ਬਹੁਤਾ ਭਰੋਸਾ ਨਹੀਂ ਕਰਦੇ,ਕਿਉਂਕਿ ਜਿੱਥੇ ਜਵਾਬਦੇਹੀ ਨਹੀਂ ਓਥੇ ਭਰੋਸਾ ਨਹੀਂ।

ਜਗਦੀਸ਼ ਕੁਮਾਰ ਦਿੱਸ਼ਾ

15/1/2017

ਸੱਤਾ ਪਰਿਵਰਤਨ ਕੋਈ ਹੱਲ ਨਹੀਂ

ਬਾਦਲਾਂ ਦੀ ਸਰਕਾਰ ਦੀ ਕਾਰਗੁਜ਼ਾਰੀਆਂ ਤੇ ਨਿਗ੍ਹਾ...ਜਿਸਦੇ ਸਿਰ ਤੇ ਇਸ ਵਾਰ ਉਹ ਤੀਜੀ ਵਾਰ ਸੱਤਾ ‛ਚ ਆਉਣ ਨੂੰ ਕਾਹਲੇ ਨੇ।

ਦੇਖੋ ਹਾਈਵੇ ਸੜਕਾਂ ਪ੍ਰਾਈਵੇਟ ਕੰਪਨੀਆਂ ਨੇ ਬਣਾਈਆਂ ਜਿਹਨਾਂ ਉੱਤੇ ਚਲਣਾ ਹੈ ਤਾਂ ਪੈਸੇ ਦੇਣੇ ਪੈਣਗੇ..ਜਿਸ ਦਾ ਲੋਕਾਂ ਨਾਲੋਂ ਵੱਧ ਫਾਇਦਾ ਇਹਨਾਂ ਦੀਆਂ ਆਪਣੀਆਂ ਟਰਾਂਸਪੋਰਟਾਂ ਨੂੰ ਵੱਧ ਹੈ,ਕਬੱਡੀ ਟੂਰਨਾਮੈਂਟ ਸਪਾਂਸਰਾਂ ਨੇ ਕਰਵਾ ਦਿੱਤੇ,ਪੁਲਿਸ ਦਾ ਇਸਤੇਮਾਲ ਆਪਣੇ ਹਿੱਤ ਸੋਧਣ ਲਈ ਕੀਤਾ,ਇੰਡਸਟਰੀ ਦਾ ਹੋਰ ਸਟੇਟਾਂ ਵਿੱਚ ਟਰਾਂਸਫਰ,ਸਾਰੇ ਕਾਰੋਬਾਰਾਂ ਦਾ ਭੱਠਾ ਬਠਾਇਆ,ਇਸਲਈ ਬੇਰੁਜ਼ਗਾਰਾਂ ਦੀ ਗਿਣਤੀ ‘ਚ ਵਾਧਾ ਹੋਇਆ,ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਅੰਗਾਂ ਨਾਲ ਬੇਅਦਬੀ ਤੇ ਸਟੈਂਡ ਨਾ ਲੈਣਾ,ਗਰੀਬ ਜਨਤਾ ਨਾਲ ਅਨੇਕਾਂ ਧੱਕੇਸ਼ਾਹੀਆਂ ਅਤੇ ਹੋਰ ਬਹੁਤ ਮਸਲੇ ਜਿਹੜੇ ਹੱਲ ਨਹੀਂ ਹੋਏ,ਤੇ ਐਤਕੀ ਫੇਰ ਇਹ ਬੀਬੇ-ਸਾਊ ਬਣ ਲੋਕਾਂ ਦੀ ਕਚਹਿਰੀ ਹਾਜਰ ਹੋਏ ਨੇ...ਬੇਨਤੀ ਹੈ ਕਿ ਇਹਨਾਂ ਦੇ ਕੀਤੇ ਕੰਮਾਂ ਦਾ ਚੰਗੀ ਤਰਾਂ ਹਿਸਾਬ ਲਗਾਉਣ ਤੋਂ ਬਾਅਦ ਹੀ ਇਹਨਾਂ ਦੇ ਹੱਥ ਆਪਣੇ ਭਵਿੱਖ ਦੀ ਡੋਰ ਫੜਾਇਓ।

ਕਿਉਂਕਿ ਪਹਿਲਾਂ ਕੀਤੇ ਗਲਤ ਫੈਸਲਿਆਂ ਨੇ ਤਾਂ ਸਾਨੂੰ ਭੁੱਖਿਆਂ ਮਾਰਿਐ... ਇੱਕ ਹੋਰ ਗਲਤ ਫੈਸਲਾ ਆਪਣੇ ਘਰ-ਬਾਰ ਛੱਡ ਕੇ ਜਾਣ ਦੀ ਨੌਬਤ ਲਿਆਊ।ਕੇਵਲ ਸੱਤਾ ਵਿੱਚ ਬਦਲਾਅ ਕੋਈ ਪੱਕਾ ਇਲਾਜ ਨਹੀਂ ਸਾਡੀਆਂ ਮੁਸੀਬਤਾਂ ਦਾ।ਇਸਲਈ ਸਾਨੂੰ ਸਾਰਿਆਂ ਨੂੰ ਆਪਣੇ ਹੱਕਾਂ ਪ੍ਰਤੀ ਜਾਗਰੂਕ ਹੋਣਾ ਪਵੇਗਾ ਅਤੇ ਅੱਖਾਂ ਖੋਲ੍ਹ ਕੇ ਪਾਰਟੀਆਂ ਦੇ ਚਰਿੱਤਰ ਦੀ ਪੜਤਾਲ ਕਰਨੀ ਪਵੇਗੀ।

ਜਿਵੇਂ ਹੀ ਸਰਕਾਰ ਦੀ ਸੱਤਾ ਦਾ ਅਖੀਰਲਾ ਪੜਾਅ ਆਇਆ ਤਾਂ ਤੁਸੀਂ ਸਾਰਿਆਂ ਨੇ ਦੇਖਿਆ ਕਿ ਸੱਤਾਧਾਰੀ ਪਾਰਟੀ ਦੇ ਨੁਮਾਇੰਦੇ ਹਰਕਤ ਵਿੱਚ ਆਏ ਅਤੇ ਜਨਤਾ ਦੀਆਂ ਮੁਸ਼ਕਿਲਾਂ ਦੇ ਹੱਲ ਲੱਭਣ ਦਾ ਡਰਾਮਾ ਸ਼ੁਰੂ ਹੋਇਆ, ਕਿਤੇ ਟੂਟੀਆਂ ਸੜਕਾਂ ਦੀ ਰਿਪੇਅਰ ਸ਼ੁਰੂ ਹੋਈ ਕਿਤੇ ਨਵੇਂ ਖੜੇ ਕੈਂਡੀਡੇਟ ਛੋਟੇ ਮੋਟੇ ਲੋਕਾਂ ਦੇ ਰੁਕੇ ਕੰਮ ਕਰਾਉਂਦੇ ਨਜਰ ਆਏ।ਵਿਰੋਧੀ ਧਿਰਾਂ ਦੇ ਨੁਮਾਇੰਦੇ ਜਿਹੜੇ ਆਪਣੇ ਹਲਕਿਆਂ ਵਿਚੋਂ ਜਿੱਤੇ ਹੋਏ ਸਨ, ਉਹ ਵੀ ਮੌਸਮੀ ਡੱਡੂਆਂ ਵਾਂਗ ਧਰਤੀ ਤੋਂ ਬਾਹਰ ਨਿੱਕਲ ਆਏ।

ਸੋਚਣ ਤੇ ਵਿਚਾਰਨ ਵਾਲੀ ਗੱਲ ਹੈ ਕਿ ਮੰਨਿਆ ਸੱਤਾਧਾਰੀ ਪਾਰਟੀ ਦੇ ਚੁਣੇ ਹੋਏ ਨੁਮਾਇੰਦੇ ਤਾਂ ਚਲੋ ਸੱਤਾ ਦੇ ਨਸ਼ੇ ‘ਚ ਚੂਰ ਸਨ ਪਰ,ਵਿਰੋਧੀ ਧਿਰ ਨੇ ਵੀ ਆਪਣੇ ਫਰਜ਼ ਤੇ ਡਟ ਕੇ ਪਹਿਰਾ ਨਹੀਂ ਦਿੱਤਾ।ਹੁਣ ਉਹੀ ਸਾਡੇ ਅੱਗੇ ਸਫਾਈਆਂ ਦੇ ਕੇ ਵੋਟ ਮੰਗਣ ਆ ਰਹੇ ਹਨ ਕਿ ਐਤਕੀ ਉਹਨਾਂ ਨੂੰ ਮੌਕਾ ਦਿਆ ਜਾਵੇ..ਪਿਛਲੀ ਵਾਰ ਤਾਂ ਉਹਨਾਂ ਦੇ ਹੱਥ ਵਿੱਚ ਕੁਝ ਨਹੀਂ ਸੀ।ਜੇ ਵਿਰੋਧੀ ਧਿਰ ਕਾਇਮ ਹੋ ਕੇ ਸਾਡੇ ਹੱਕਾਂ ਦੀ ਰਾਖੀ ਕਰਦੀ ਤਾਂ ਸੰਭਵ ਸੀ ਕਿ ਉਨ੍ਹਾਂ ਹੱਥ ਜਨਤਾ ਜਰੂਰ ਸੂਬੇ ਦੀ ਵਾਗਡੋਰ ਸੌਂਪਦੀ।ਹਾਲੇ ਬੁੱਕਾਂ ਚੋਂ ਬੇਰ ਡੁੱਲ੍ਹੇ ਨਹੀਂ,ਫੈਸਲਾ ਅਜੇ ਸਾਡੇ ਹੱਥ ਵਿੱਚ ਹੈ ਕਿ ਅਸੀਂ ਆਪਣਾ ਭਵਿੱਖ ਕਿਹੜੇ ਹੱਥਾਂ ‘ਚ ਦੇਣਾ ਹੈ।ਸੋ ਬੇਨਤੀ ਹੈ ਕਿ ਕਿਸੇ ਵੀ ਪਾਰਟੀ ਨੂੰ ਦੇਖ ਕੇ ਆਪਣੀ ਵੋਟ ਨਾਂ ਦੇਣਾ ਬਲਕਿ ਚੰਗੇ ਕੈਂਡੀਡੇਟ ਨੂੰ ਦੇਖ ਕੇ ਆਪਣਾ ਨੁਮਾਇੰਦਾ ਚੁਣਿਓ,ਜੋ ਤੁਹਾਡੇ ਸੁਖ-ਦੁਖ ਵਿੱਚ ਵਿਚਰਦਾ ਰਿਹਾ ਹੋਵੇ।

ਧੰਨਵਾਦ।

ਜਗਦੀਸ਼ ਕੁਮਾਰ ਦਿੱਸ਼ਾ

(ਇਹ ਲੇਖਕ ਦੇ ਆਪਣੇ ਨਿੱਜੀ ਵਿਚਾਰ ਹਨ ਅਤੇ ਇਹ ਵਿਚਾਰ ਕਿਸੇ ਵੀ ਰਾਜਨੀਤਿਕ ਪਾਰਟੀ ਜਾਂ ਨੁਮਾਇੰਦੇ ਦੀ ਪੈਰਵੀ ਨਹੀਂ ਕਰਦੇ)