ਸੱਚਾ ਇਸ਼ਕ ਖ਼ੁਦਾ ਦਾ

ਸੱਚਾ ਇਸ਼ਕ ਓਸ ਖ਼ੁਦਾ ਦਾ

ਜੋ ਮਿਲ ਕੇ ਜੁਦਾ ਨਾ ਹੋਵੇ

ਝੂਠੇ ਹਨ ਸਭ ਰਿਸ਼ਤੇ ਐੱਥੇ

ਜੋ ਵੀ ਲਾਉਣ ਪ੍ਰੀਤਾਂ,ਸੋ ਰੋਵੇ

ਖ਼ੁਦਾ ਮਹਿਬੂਬ ਬਣ ਜਾਂਦੈ

ਕਦੀ ਮਹਿਬੂਬ ਖ਼ੁਦਾ ਨਾ ਹੋਵੇ

 

ਛੱਡ ਖਹਿੜਾ

ਉਡੀਕ...ਮੁੱਕਦੀ ਨਹੀਂ !

ਮੁਕਾਉਣੀ ਪੈਂਦੀ ਹੈ ;

ਮਨ ਨੂੰ ਸਮਝਾ ਕੇ...

ਜ਼ਿੰਦਗੀ ਦੇ ਹੋਰ,ਰੰਗ ਦਿਖਾ ਕੇ

ਕੇ ਚਲ ਮਨਾਂ,ਛੱਡ ਖਹਿੜਾ

ਓਥੇ ਕੀ ਮਿਲਣਾ,ਜਿੱਥੇ ਰਹੇ ਚੁੱਪ

ਮੰਗ ਨਾ ਖੈਰਾਤ..!

ਜਿੱਥੇ ਸੁੰਨੇ ਹੋਣ ਜਜ਼ਬਾਤ

ਅੱਗੇ ਤੁਰ, ਛੱਡ ਖਹਿੜਾ 

ਸੱਜਣ

ਖ਼ਿਆਲ ਸੱਜਣਾਂ ਦਾ,ਸੱਜਰੀ ਸਵੇਰ ਵਰਗਾ

ਜਿਵੇਂ ਕੱਲਰਾਂ 'ਚ ਮਸਾਂ,ਖਿੜੇ ਕਿਸੇ ਫੁੱਲ ਵਰਗਾ

ਸੱਧਰਾਂ ਦੇ ਬਜ਼ਾਰ,ਕਿਸੇ ਲੁਟੇ ਖੜ੍ਹੇ ਨੂੰ ਮਿਲ ਜੇ

ਬਦਲੇ ਗ਼ਮਾਂ ਦੇ ਸਾਥੀ,ਹੀਰਿਆਂ ਦੇ ਮੁੱਲ ਵਰਗਾ